Ilir Meta ka lënë mëngjesin e sotëm ambientet e paraburgimit për t’u nisur drejt Cepanit të Skraparit, ku do të marrë pjesë në ceremoninë mortore të babait të tij, Rexhep Meta, i cili ndërroi jetë të hënën në moshën 83-vjeçare.

Sipas informacioneve, Meta është shoqëruar nga autoritetet që prej orës 07:00, ndërsa ceremonia e varrimit do të zhvillohet në orën 12:00.

Leja e miratuar parashikon që ish-presidenti të jetë i pranishëm jo vetëm në ceremoninë mortore, por edhe në drekën që do të shtrohet pas saj për familjarët dhe të afërmit.

Burime pranë çështjes bëjnë me dije se Meta do të rikthehet në paraburgim gjatë pasdites, për të dalë sërish mëngjesin e së nesërmes. Me miratimin e prokurorëve të SPAK, atij i është dhënë leje nga ora 09:00 deri në 21:00 për të marrë pjesë në pritjet e ngushëllimit që familja do të organizojë në Tiranë.

Rexhep Meta ndërroi jetë në moshën 83-vjeçare, ndërsa familjarë, të afërm dhe personalitete të jetës publike pritet t’i japin lamtumirën e fundit në vendlindjen e tij, në Cepan të Skraparit.