Një aksident tragjik me pasojë humbjen e jetës së një të riu është regjistruar mbrëmjen e së martës në Sukth.

Ngjarja ka ndodhur rreth orës 23:45, në rrugën që lidh Sukthin me Rrushkull, në lagjen Stalla.

Sipas të dhënave paraprake nga policia, një automjet është përplasur me një motomjet që drejtohej nga një 28-vjeçar.

Për shkak të plagëve të marra nga përplasja e fortë, i riu ka ndërruar jetë në vendngjarje, pa mundur t’u mbijetojë dëmtimeve.

Menjëherë pas aksidentit, në zonë kanë mbërritur shërbimet e policisë dhe grupi hetimor, të cilët kanë kryer veprimet e para procedurale dhe kanë nisur hetimet për zbardhjen e plotë të ngjarjes.

Policia bëri me dije se është arrestuar drejtuesi i automjetit, një 19-vjeçar, ndërsa hetimet vijojnë për të përcaktuar shkaqet dhe dinamikën e aksidentit fatal që i mori jetën 28-vjeçarit.