Bolzano – Policia italiane ka finalizuar një operacion të gjerë antidrogë të koduar “Daku”, duke goditur një organizatë kriminale të dyshuar me përbërje kryesisht nga shtetas shqiptarë.

Pas rreth dy viteve hetime, autoritetet kanë ekzekutuar 28 masa sigurie, mes tyre arrest me burg, arrest shtëpie dhe detyrim paraqitjeje. Hetimet kanë nisur në vitin 2023 dhe kanë zbuluar një rrjet të strukturuar trafiku narkotikësh në disa vende të Europës.

Sipas autoriteteve italiane, grupi dyshohet se ishte i organizuar në celula dhe kishte role të mirëpërcaktuara, ndërsa droga – kokainë, heroinë, hashash dhe kanabis – dyshohet se vinte nga Amerika Latine dhe shpërndahej në Itali përmes rrugëve tranzite si Belgjika dhe Spanja.

Gjatë operacionit janë sekuestruar mbi 60 kilogramë lëndë narkotike, rreth 80 mijë euro cash, si dhe armë dhe prova të tjera materiale.

Hetimet janë mbështetur në përgjime telefonike dhe ambientale, si dhe në analizimin e komunikimeve në rrjete sociale, ku anëtarët e grupit përdornin gjuhë të koduar dhe nofkën “Daku” për komunikim.

Autoritetet italiane bëjnë me dije se operacioni vijon, ndërsa Antimafia e Trento Antimafia po punon për të identifikuar të gjitha lidhjet e rrjetit kriminal në nivel ndërkombëtar.