Një ngjarje tronditëse ka tronditur komunitetin lokal në Viotia të Greqisë, pas zbulimit të një trupi të karbonizuar brenda një automjeti të djegur, në një zonë të izoluar rurale.

Sipas mediave greke, automjeti është zbuluar rastësisht nga një gjuetar, i cili ka vënë re makinën e shkrumbuar dhe ka njoftuar menjëherë Policinë. Gjatë këqyrjes së vendngjarjes, hetuesit gjetën trupin e pajetë brenda mjetit dhe pranga, një detaj që shton dyshimet për një akt kriminal të mirëplanifikuar.

Zëdhënësja e Policisë Helenike, Constantia Dimoglidou, konfirmoi se automjeti është transportuar në laboratorët mjeko-ligjorë për analiza të ADN-së dhe gjurmëve të gishtërinjve. Për shkak të shkallës së lartë të djegies, identifikimi i viktimës pritet të jetë i vështirë dhe i gjatë.

Sipas autoriteteve, mjeti dhe trupi i pajetë mund të kenë qëndruar rreth 48 orë në vendngjarje përpara zbulimit. Departamenti i Vrasjeve dhe Drejtoria e Krimit të Organizuar po hetojnë ngjarjen dhe po krahasojnë rastin me zhdukjet e raportuara kohët e fundit.

Policia nuk përjashton asnjë pistë, ndërsa të dhënat paraprake sugjerojnë se autorët njihnin mirë zonën ku u la automjeti. Hetimet vijojnë me intensitet, dhe autoritetet u bëjnë thirrje qytetarëve të ndihmojnë me çdo informacion që mund të ndihmojë në zbardhjen e plotë të kësaj ngjarjeje makabre.