Një studim i ri nga Universiteti Anglia Ruskin ka zbuluar se emocionet në vendin e punës nuk lidhen drejtpërdrejt me natyrën e punës, por më shumë me marrëdhëniet mes kolegëve. Në anketimin me mbi 2,000 punonjës dhe 250 drejtues, pjesëmarrësit raportuan ndjenja që varionin nga gëzimi dhe surpriza, deri te zemërimi, frika dhe trishtimi.

Sipas studimit, burrat reagojnë më fort ndaj kritikave dhe përfshihen më emocionalisht në detyra e projekte. 43% e tyre pranuan se kanë ngritur zërin në situata ku ndjenin se idetë e tyre janë injoruar. “Burrat kanë më shumë gjasa të ndiejnë emocione të lidhura me pushtetin, si zemërimi apo krenaria,” shpjegon Dr. Terry Simpkin, autori i studimit.

Nga ana tjetër, gratë përballen më shumë me stres dhe frustrim, por priren t’i fshehin emocionet pas një “buzëqeshjeje të rreme”. Rreth një në tre punonjës pranoi se fsheh ndjenjat e vërteta gjatë orarit të punës.

Studimi zbulon gjithashtu se 30% e shefave e shohin shprehjen e emocioneve si shenjë dobësie, ndërsa gjysma mendojnë se ambienti i punës duhet të jetë “pa emocione”.

Ndër brezat më të rinj, mijëvjeçarët rezultojnë më të ndjeshmit emocionalisht – 91% e tyre kanë përjetuar trishtim ose zemërim në punë. Megjithatë, studiuesit theksojnë se me kalimin e viteve, punonjësit fitojnë qetësi emocionale dhe aftësi më të mira për t’u përshtatur.

“Vetëdija emocionale do të jetë çelësi i suksesit në të ardhmen e punës,” përfundon Dr. Simpkin, duke nënvizuar rëndësinë e zhvillimit të inteligjencës emocionale si pjesë e kulturës së re profesionale.