Delegacioni i Bashkimit Evropian në Tiranë ka reaguar ndaj ndryshimeve të fundit në ligjin “Për portet turistike”, duke vënë në dyshim transparencën e procesit dhe përputhshmërinë e tij me standardet e Bashkimit Evropian.

Në deklaratën për News 24, BE thekson se ligji i miratuar nga Kuvendi ngre shqetësime për mënyrën e dhënies së koncesioneve, duke paralajmëruar se procedurat jo transparente dhe jo konkurruese mund të dëmtojnë integritetin e prokurimit publik.

Sipas delegacionit, disa prej dispozitave të reja janë të ngjashme me ligjin për Investitorët Strategjikë, një akt ligjor që Shqipëria është zotuar ta shfuqizojë në kuadër të procesit të integrimit evropian.

“Ndryshimet do të duhet të vlerësohen nga afër nga shërbimet tona, veçanërisht në fushën e prokurimit publik dhe përputhshmërinë me legjislacionin e BE-së”, thuhet në reagim.

BE shton se procedurat për dhënien e koncesioneve duhet të jenë të hapura dhe konkurruese, ndërsa thekson se Shqipëria duhet të shmangë çdo hap që bie ndesh me angazhimet e saj në procesin e integrimit.