Gazetari i njohur Blendi Fevziu ka komentuar me tone ironike një moment të diskutuar gjerësisht në publik, ku aktori i madh Robert Ndrenika u shfaq duke mbështetur simbolikisht kryebashkiakun Erion Veliaj gjatë një seance gjyqësore në Gjykatën Administrative.

I ftuar në një emision televiziv, Fevziu tha se çdo person ka të drejtë të shprehë qëndrimin e tij, por mënyra e shfaqjes publike e situatës, sipas tij, e kthen ngjarjen në një “teatër të panevojshëm”.

“Që Robert Ndrenika mund të shprehë deklarata pro Veliajt është e drejtë e tij… por zgjedhja e një teatri të tillë është e papranueshme. Ngjan si një film i Kinostudios ‘Shqipëria e Re’”, u shpreh ai me ironi.

Fevziu shtoi gjithashtu se skena të tilla nuk i sjellin dobi askujt: “Është e drejta e tij të mbajë qëndrim, por këto akte nuk kanë vlerë as për Veliajn”, duke nënvizuar se spektaklizimi i proceseve gjyqësore dëmton vetë figurat publike të përfshira.

Deklaratat e tij kanë ngjallur reagime të ndryshme në opinionin publik, duke rikthyer debatin mbi ndërthurjen e figurave të artit me çështje të drejtësisë dhe politikës.