Juventusi është shumë pranë finalizimit të marrëveshjes për rikthimin e Randal Kolo Muanit. Negociatat mes “Zonjës së Vjetër” dhe Paris Saint-Germain kanë shënuar progres të rëndësishëm gjatë orëve të fundit, ndërsa palët ndodhen vetëm një hap larg akordit përfundimtar.

Që prej mbrëmjes së së hënës në Itali flitej për orë vendimtare sa i përket rikthimit të sulmuesit francez në Torino. Sipas raportimeve, trajneri Luciano Spalletti ka këmbëngulur që klubi ta mbyllë me sukses këtë operacion, i cili është kthyer në një nga sagat më të gjata të merkatos së verës.

Formula e marrëveshjes parashikon huazimin e Kolo Muanit me detyrim blerjeje për 40 milionë euro, plus bonuse. Pikërisht rritja e bonusit dhe një klauzolë që lidhet me përfitimet nga një shitje e ardhshme kanë qenë elementët që kanë afruar ndjeshëm Juventusin dhe PSG-në drejt marrëveshjes.

Kolo Muani e njeh mirë ambientin bardhezi, pasi ishte pjesë e Juventusit nga janari deri në qershor të vitit 2025. Gjatë asaj periudhe ai zhvilloi 22 ndeshje në të gjitha kompeticionet, duke shënuar 10 gola dhe dhënë 3 asistime në Serie A, Kupën e Italisë, Ligën e Kampionëve dhe Kupën e Botës për Klube.

Verën e kaluar, drejtori i atëhershëm sportiv i Juventusit, Damien Comolli, zhvilloi negociata të gjata me PSG-në për ta mbajtur sërish sulmuesin në Torino me formulën e huazimit, por kërkesat financiare të klubit francez e bënë marrëveshjen të pamundur. Si alternativë, Juventusi u orientua drejt transferimit të Loïs Opendës në ditët e fundit të merkatos.

Tashmë, gjithçka tregon se rikthimi i Randal Kolo Muanit është shumë pranë konkretizimit, me Juventusin që synon ta mbyllë marrëveshjen brenda ditëve në vijim.