Është thelluar tragjedia e ndodhur në fshatin Domen të Postribës, në Shkodër, ku një zjarr që përfshiu një banesë i ka marrë jetën një 24-vjeçareje dhe dy fëmijëve të saj të mitur.

Pas gjetjes së pajetë të njërit prej fëmijëve, ekipet e kërkim-shpëtimit kanë nxjerrë nga rrënojat e djegura edhe trupat e pajetë të nënës, Bleona Çelaj, dhe fëmijës tjetër, duke e çuar në tre numrin e viktimave të kësaj ngjarjeje të rëndë.

Burime bëjnë me dije se Bleona Çelaj dhe dy fëmijët e saj ishin kthyer së fundmi nga Gjermania dhe kishin shkuar në banesën e vjetër të familjes në fshatin Domen.

Grupi hetimor vijon punën për zbardhjen e plotë të dinamikës së ngjarjes, ndërsa hetimet janë fokusuar fillimisht në pistën e një zjarri aksidental, pa përjashtuar as pista të tjera.

Sipas njoftimit paraprak të Policisë së Shkodrës:

“Rreth orës 13:10, në fshatin Domen, Shkodër, ka rënë zjarr dhe është djegur banesa në pronësi të shtetasit B. Ç. Shërbimet e Policisë dhe punonjësit e shërbimit zjarrfikës, pas marrjes së njoftimit, kanë shkuar në vendngjarje. Nga veprimet e para dyshohet se, si pasojë e zjarrit, kanë humbur jetën shtetasja Bleona Çelaj, 24 vjeçe, dhe dy fëmijë të mitur, përkatësisht 3 vjeç dhe 1 vjeç e gjysmë. Grupi hetimor, nën drejtimin e Prokurorisë, po punon për përcaktimin e shkakut të rënies së zjarrit dhe dokumentimin e plotë të rrethanave të ngjarjes.”

Autoritetet pritet të hedhin më shumë dritë mbi shkaqet e kësaj tragjedie, e cila ka tronditur komunitetin e Postribës dhe mbarë opinionin publik.