Një 32-vjeçar është arrestuar nga Policia, pasi dyshohet se ka qëlluar me armë zjarri në drejtim të një automjeti të parkuar në lagjen “1 Maji” të Kuçovës.

Ngjarja ka ndodhur rreth orës 15:40, kur 24-vjeçari Senad Rroshniku ka njoftuar Policinë se në drejtim të automjetit të tij, i cili ndodhej i parkuar, ishte qëlluar me armë zjarri.

Pas veprimeve të shpejta hetimore, shërbimet e Komisariatit të Policisë Kuçovë, në bashkëpunim me Prokurorinë Berat dhe Forcën e Posaçme Operacionale të DVP Tiranë, kanë bërë të mundur lokalizimin dhe kapjen në Tiranë të dy personave të dyshuar.

Në pranga kanë rënë A. Ç., alias A. Gj., 32 vjeç, dhe A. Xh., 49 vjeç, të dy banues në Kuçovë.

Gjatë kontrollit të banesës së 49-vjeçarit, në tarracë është gjetur dhe sekuestruar një armë zjarri, së bashku me disa fishekë, të cilat dyshohet se lidhen me ngjarjen.

Policia njofton se 32-vjeçari është arrestuar për veprat penale “Mbajtja pa leje e armëve dhe municionit”, “Kanosja” dhe “Shkatërrimi i pronës”.

Ndërsa 49-vjeçari A. Xh. është arrestuar për veprat penale “Përkrahja e autorit të krimit” dhe “Veprime që pengojnë zbulimin e të vërtetës”.

Në kuadër të hetimit është proceduar në gjendje të lirë edhe S. Gj., 65 vjeç, banues në Kuçovë, për veprën penale “Veprime që pengojnë zbulimin e të vërtetës”.

Në njoftimin zyrtar, Policia sqaron:

“Kuçovë/ Qëlloi me armë zjarri drejt një automjeti të parkuar, brenda pak orëve kapet dhe vihet në pranga autori i dyshuar. Në pranga edhe një shtetas tjetër, i dyshuar për përkrahjen e autorit të krimit. Sekuestrohen arma e zjarrit dhe municion.”

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme.

Grupi hetimor vijon punën për dokumentimin e plotë të rrethanave dhe përcaktimin e përgjegjësive për ngjarjen.