Egnatia nuk po lufton vetëm për të shkruar historinë në arenën europiane, por edhe për të siguruar të ardhura që mund të transformojnë të ardhmen financiare të klubit. Kampionia e Shqipërisë ka garantuar tashmë 1.710.000 euro nga UEFA, pavarësisht rezultatit në dy sfidat e ardhshme të sezonit europian.

Shuma e siguruar deri tani përfshin 700.000 euro për pjesëmarrjen në katër raundet kualifikuese (175.000 euro për secilin raund), 750.000 euro bonus për arritjen në fazën “play-off” dhe 260.000 euro si shpërblim për fitimin e titullit kampion të Shqipërisë.

Kjo do të thotë se edhe në rast se Egnatia eliminohet në raundin e tretë të Europa League dhe më pas në “play-off”-in e Conference League, klubi nga Rrogozhina do të arkëtojë gjithsesi plot 1.71 milionë euro.

Megjithatë, synimi i madh mbetet kualifikimi në fazën e ligës, ku shpërblimet financiare rriten ndjeshëm. Nëse Egnatia siguron një vend në fazën e ligës së Conference League, përfitimet totale nga UEFA do të arrijnë në 3.870.000 euro.

Skenari ideal për kampionët e Shqipërisë është kualifikimi në fazën e ligës së Europa League. Në këtë rast, Egnatia do të përfitonte plot 4.330.000 euro nga UEFA, një shumë rekord që do të renditej mes të ardhurave më të mëdha të siguruara ndonjëherë nga një klub shqiptar në garat europiane.

Përveç prestigjit sportiv dhe mundësisë për t’u përballur me klube të elitës së futbollit europian, Egnatia po luan edhe për një shpërblim ekonomik që mund të ndikojë ndjeshëm në zhvillimin e klubit në vitet e ardhshme.

Me 1.71 milionë euro tashmë të garantuara dhe mundësinë për ta çuar këtë shifër deri në 4.33 milionë euro, skuadra rrogozhinase ndodhet përballë një prej momenteve më të rëndësishme në historinë e saj.