Një aksident i rëndë është regjistruar mesditën e kësaj të enjteje në aksin rrugor Krutje – Pushimi i Shoferit, ku një automjet tip “Benz” ka humbur kontrollin dhe ka përfunduar në një kanal kullues me ujë.

Në mjet udhëtonin babë e bir, të cilët janë shpëtuar falë ndërhyrjes së menjëhershme të banorëve të zonës. Sipas dëshmitarëve, ata kanë hyrë në kanal dhe kanë thyer xhamin e automjetit për të nxjerrë dy personat e bllokuar brenda.

Në vendngjarje mbërritën forcat zjarrfikëse dhe dy ambulanca, ndërsa të lënduarit u transportuan me urgjencë drejt Spitalit të Lushnjës për ndihmë mjekësore.

Banorët e zonës shprehen se segmenti ku ndodhi aksidenti është kthyer në një pikë problematike, duke theksuar se mungesa e bordurave mbrojtëse në urën mbi kanal ka shkaktuar edhe incidente të tjera në të kaluarën.

“Këtu kanë ndodhur disa aksidente. Ura nuk ka bordurë mbrojtëse dhe kemi bërë ankesa vazhdimisht, por ende nuk është marrë asnjë masë,” thanë banorët.

Ndërkohë, Policia Rrugore ka nisur veprimet për dokumentimin e plotë të ngjarjes dhe po heton shkaqet që çuan në daljen e automjetit nga rruga. Fatmirësisht, aksidenti nuk ka shkaktuar humbje jete.