Policia e Kosovës ka arrestuar tre persona, një me origjinë nga Serbia dhe dy nga Mali i Zi, pas zbulimit dhe sekuestrimit të rreth 25 kilogramëve marihuanë gjatë një operacioni të zhvilluar në veri të vendit.

Sipas njoftimit zyrtar, lënda narkotike u gjet gjatë kontrollit të detajuar të një automjeti të ndaluar në Zveçan, ku policia konstatoi hapësira të posaçme të modifikuara për fshehjen e drogës.

“Gjatë kontrollit të detajuar të automjetit të ndaluar në Zveçan janë zbuluar hapësira të modifikuara për fshehjen e narkotikëve, ku janë gjetur rreth 25.984 kg substancë e dyshuar narkotike e llojit marihuanë, ndërsa vetura e ndaluar në Jarinjë dyshohet se ishte në rolin e përcjellësit për sigurim të rrugës”, thuhet në njoftimin e Policisë së Kosovës.

Të dyshuarit janë shoqëruar në komisariat për veprime të mëtejshme procedurale, ndërsa hetuesit po punojnë për të zbardhur origjinën dhe destinacionin e lëndës narkotike, si dhe për të identifikuar persona të tjerë që mund të jenë të përfshirë në këtë aktivitet të paligjshëm.

Policia bëri të ditur se hetimet për rastin vijojnë.