Protestat kundër kryeministrit Edi Rama janë shtrirë edhe jashtë vendit, duke mbërritur deri në Kanada, ku emigrantë shqiptarë janë mbledhur në Toronto për të shprehur pakënaqësinë e tyre.

Në protestën e zhvilluar në qytetin kanadez, pjesëmarrësit kanë mbajtur thirrje si: “Zgjohu Shqipëri”, “Rama të dorëhiqet” dhe “Shqipëria është e jona”.

Të veshur me bluza me simbole kombëtare dhe me flamuj kuqezi në duar, protestuesit kanë përcjellë mesazhe patriotike dhe kanë kërkuar dorëheqjen e kryeministrit.

Sipas raportimeve, protesta në Toronto vjen paralelisht me tubimet që po zhvillohen prej ditësh në Tiranë, në Bulevardin “Dëshmorët e Kombit”, si dhe në qytete të tjera të vendit.

Organizatorët e lëvizjeve kundërshtuese thonë se reagimet lidhen me vendime të qeverisë dhe projekte zhvillimi, përfshirë ato në zonën e Zvërnecit, të cilat sipas tyre prekin interesin publik dhe pasuritë natyrore të Shqipërisë.