Zhvillime të forta kanë dalë në pah gjatë seancës në Gjykata Themelore në Prishtinë, ku i akuzuari Granit Plava ka ndryshuar deklaratën e tij, duke pretenduar se vrasja e Liridona Ademajt është kryer në marrëveshje me bashkëshortin e saj, Naim Murseli.

Gjatë dëshmisë, Plava u tërhoq nga versioni i mëparshëm i dhënë në polici, duke theksuar se deklarata e re është ajo e vërteta. Ai pretendoi se dëshminë e parë e kishte dhënë në përputhje me një marrëveshje të supozuar me Murselin.

Sipas tij, kishte qenë në dijeni të planit dhe kishte pranuar të merrte përgjegjësinë për krimin në këmbim të përfitimeve materiale. Plava deklaroi se i ishin premtuar 1300 euro në muaj, një automjet luksoz dhe mbështetje pas arrestimit.

Ai shtoi se ishte takuar disa herë me Murselin, përfshirë edhe ditën e ngjarjes, ndërsa pretendon se vetëm një ditë më vonë kishte mësuar se viktima ishte bashkëshortja e tij, Liridona Ademaj. Plava shprehu pendesë, duke thënë se i ishte thënë se bëhej fjalë për një person tjetër.

Në këtë çështje është i akuzuar edhe Kushtrim Kokalla, i cili sipas aktakuzës dyshohet se ka ndërmjetësuar mes palëve.

Ndërkohë, gjatë së njëjtës ditë, në gjykatë ka dëshmuar edhe Naim Murseli, i cili ka mohuar çdo përfshirje në planifikimin e vrasjes. Ai deklaroi se natën e ngjarjes kishte qenë viktimë e një grabitjeje, por pranoi se arma e krimit ishte blerë prej tij nga Plava, me pretendimin se do ta shiste më pas.

Liridona Ademaj u vra më 29 nëntor 2023, në moshën 30-vjeçare, në një rrugë në fshatin Bërnicë të Prishtinës. Çështja vijon të mbetet një nga më të ndjeshmet dhe të ndjekurat nga opinioni publik në Kosovë.