Seanca plenare në Kuvend u shoqërua edhe me thirrje për bashkëpunim nga mazhoranca, ku kreu i grupit parlamentar të PS, Taulant Balla, i kërkoi opozitës të lërë mënjanë akuzat dhe të fokusohet te integrimi europian.

Në fjalën e tij, Balla theksoi se Shqipëria ka bërë përparim të dukshëm në procesin e anëtarësimit në BE, duke cituar edhe deklaratat e zyrtarëve europianë, përfshirë Kaja Kallas.

“Ajo që duhet t’u themi me krenari shqiptarëve nuk janë shpresat apo mallkimet e atyre që thonë se negociatat kanë ngecur. Është fakt nga Komisioni Europian se Shqipëria ka përmbushur detyrimet në procesin e anëtarësimit në BE,” u shpreh ai.

Sipas Ballës, të gjitha piketat e ndërmjetme janë realizuar dhe procesi tashmë ndjek procedurat formale nga Komisioni Europian drejt Këshillit dhe vendeve anëtare.

Ai theksoi gjithashtu pritshmëritë për anëtarësimin:
“Siç u komunikua nga komisionerja dhe nga Kaja Kallas, pritshmëria që Shqipëria të mbyllë procesin e anëtarësimit deri në vitin 2030 është shumë realiste.”

Duke iu referuar deklaratave të Kallas, ai shtoi:
“Shqipëria dhe Mali i Zi duhet të bëhen gati për pjesëmarrje në zgjedhjet e vitit 2029 për Parlamentin Europian, ky është fakt.”

Në fund, Balla bëri thirrje për reflektim politik:
“Hiqni dorë nga kjo baltë që po i hidhni Shqipërisë. Është moment historik për të punuar bashkë dhe për ta çuar përpara këtë aspiratë.”

Debatet për integrimin europian mbeten në qendër të përplasjes mes mazhorancës dhe opozitës, ndërsa palët japin qëndrime të kundërta mbi ecurinë e procesit.