Debatet në seancën plenare vijuan me kërkesat e opozitës për interpelanca, ku deputeti i Partisë Demokratike, Saimir Korreshi, bëri thirrje për një përballje direkte me ministren e Shëndetësisë, Evis Salla.

Nga foltorja e Kuvendit, Korreshi theksoi se situata në spitalin e Lushnjës është alarmante dhe nuk mund të shtyhet më.

“Mendër jush kam bërë edhe unë një kërkesë për interpelancë. Para ’90, nga ato vite e qoftë largu, kur mbaja radhën për vajgur, kur më vinte mua radha mbaronte vajguri,” u shpreh ai, duke bërë një krahasim ironik me të kaluarën.

Ai vijoi duke theksuar urgjencën e situatës:
“Problemi është se në Lushnje nuk pret situata se kur do rregullohet dhe kur do ta ketë terezinë ministrja… Deri në fund të vitit nuk pret situata.”

Kërkesa e tij vjen në një moment kur opozita ka ngritur shqetësime të vazhdueshme për gjendjen e sistemit shëndetësor dhe shërbimet në spitalet rajonale.

Ndërkohë, mazhoranca nuk ka dhënë ende një reagim konkret lidhur me kërkesën për interpelancë.