Vendimi i qeverisë shqiptare për të financuar me 4 milionë euro koncertin e reperit amerikan Kanye West në Tiranë ka tërhequr vëmendjen e mediave ndërkombëtare. Prestigjiozja amerikane NBC News i ka kushtuar një artikull kësaj çështjeje, duke trajtuar reagimet që ka shkaktuar përdorimi i fondeve publike, si dhe argumentet e kryeministrit Edi Rama në mbrojtje të këtij vendimi.

Sipas NBC News, artisti amerikan, i njohur edhe si Ye, është ndaluar të performojë në disa vende evropiane këtë verë pas deklaratave të tij kontroverse, që kanë përfshirë lavdërime për Adolf Hitlerin dhe përdorimin e simboleve naziste. Më vonë, reperi ka kërkuar falje për një pjesë të këtyre deklaratave.

Artikulli thekson se koncerti, i planifikuar të mbahet më 11 korrik në periferi të Tiranës, do të zhvillohet në një stadium të përkohshëm të ndërtuar posaçërisht për këtë aktivitet.

Në reagimin e cituar nga NBC News, kryeministri Edi Rama mbrojti financimin e koncertit, duke deklaruar se fondet u akorduan për të shmangur anulimin e eventit.

“Ne akorduam 4 milionë euro në momentin e fundit për të shmangur turpërimin e Shqipërisë përballë afro 25 mijë vizitorëve të huaj nga 80 vende, të cilët kishin blerë tashmë biletat për të parë Kanye West, ndërsa shumë të tjerë kishin frikë se koncerti mund të anulohej”, citohet të ketë deklaruar Rama.

Sipas kryeministrit, aktiviteti pritet t’i sjellë ekonomisë shqiptare të paktën 100 milionë euro të ardhura, falë rritjes së rezervimeve në strukturat akomoduese dhe fluksit të turistëve.

NBC News shkruan se deklarata e Ramës u pasua nga reagime të shumta kritike në rrjetet sociale, ku komentues të ndryshëm kundërshtuan përdorimin e fondeve publike për organizimin e koncertit.

Artikulli ndalet edhe te protestat që zhvillohen prej më shumë se një muaji në Tiranë. Sipas medias amerikane, ato nisën pas kundërshtimeve ndaj planeve për ndërtimin e një resorti luksoz nga Jared Kushner, dhëndri i presidentit amerikan Donald Trump, ndërsa më pas u zgjeruan duke përfshirë kundërshtimin e projekteve të tjera zhvillimore në bregdet dhe kërkesat për dorëheqjen e kryeministrit Edi Rama. Në artikull theksohet gjithashtu se Rama i ka mohuar akuzat për korrupsion të ngritura nga protestuesit.