Një nga momentet më emocionale të protestës së zhvilluar përpara Kryeministrisë u regjistrua kur në podium mori fjalën një nxënës i shkollës “Kiço Blushi”, i cili zgjodhi të fliste në emër të bashkëmoshatarëve të tij dhe të kujtonte Martin Canin.

Me një mesazh të ndjerë, i mituri u kërkoi qytetarëve të pranishëm të mbanin një minutë heshtje në nderim të të riut, ndërsa më pas ndau shqetësimet e tij për arsimin dhe vështirësitë me të cilat përballen shumë fëmijë në Shqipëri.

“Jam një nxënës i shkollës ‘Kiço Blushi’ dhe dua të flas për bashkëmoshatarët e mi. Dua të flas për Martin Canin që ndërroi jetë, dua të mbajmë një minutë heshtje për të. Faleminderit…”, u shpreh ai, duke bërë që protesta të ndalonte për disa çaste në shenjë respekti.

Më tej, nxënësi foli për rëndësinë e arsimit dhe shprehu keqardhjen për fëmijët që, sipas tij, nuk kanë mundësi të ndjekin shkollën në kushte të mira.

“Shkolla ime ka qenë më e mira që kam pasur. Më vjen keq për ata fëmijë që nuk marrin dot arsim. Edi Rama jep dorëheqjen! Jep dorëheqjen sa më parë!”, deklaroi ai.

Fjalimi i nxënësit u prit me duartrokitje nga protestuesit e mbledhur përpara Kryeministrisë, të cilët iu bashkuan edhe thirrjeve të tij në përfundim të fjalës.