Biznesmeni dhe investitori Behgjet Pacolli ka reaguar ashpër për situatën e krijuar në Aeroportin e Vlorës, duke denoncuar atë që e cilëson si bllokim të paligjshëm të aktivitetit të kompanisë MABCO dhe duke ngritur pikëpyetje serioze mbi funksionimin e shtetit ligjor në Shqipëri.

Përmes një reagimi në rrjetet sociale, Pacolli akuzon grupe të organizuara se po pengojnë vijimin e punimeve në një investim strategjik me vlerë mbi 310 milionë euro, ndërsa kërkon ndërhyrjen e institucioneve shtetërore.

“Grupet kriminale prapë kanë bllokuar aksesin në Aeroportin e Vlorës, ku MABCO ka investuar mbi 310 milionë euro! A është KRIM bllokimi i një aktiviteti të ligjshëm me roje private, mjete të rënda dhe vetëgjyqësi? Nëse po, pse nuk po vepron askush?”, shkruan ai.

Pacolli ngre një sërë pyetjesh lidhur me rolin e kompanive private të sigurisë dhe zbatimin e vendimeve gjyqësore, duke deklaruar se situata ka tejkaluar kufijtë e një konflikti biznesi.

“Nëse secili në këtë vend mund të marrë disa roje private, të bllokojë hyrje-daljet, të pengojë zbatimin e vendimeve gjyqësore dhe të imponojë vullnetin e tij me forcë, atëherë a jetojmë në Republikën e Shqipërisë apo në Republikën e Rojeve Private?”, pyet ai.

Sipas Pacollit, është e papranueshme që hyrja në një aset strategjik kombëtar të bllokohet fizikisht, pavarësisht vendimeve të Asamblesë së Ortakëve, vendimeve të Gjykatës së Lartë dhe kërkesave të institucioneve shtetërore.

“Për çfarë na duhen gjykatat? Për çfarë na duhen institucionet? Për çfarë na duhet shteti?”, vijon ai.

Në reagimin e tij, investitori thekson se çështja nuk lidhet më vetëm me MABCO-n apo me kompaninë 2A Group, por me vetë funksionimin e shtetit ligjor.

“Sot nuk po diskutojmë më për një konflikt biznesi. Sot po diskutojmë për ekzistencën e shtetit ligjor. Sot është vënë në pikëpyetje autoriteti i shtetit. Sot shtrohet pyetja themelore: a zbatohen vendimet e Gjykatës së Lartë në Republikën e Shqipërisë apo jo?”, deklaron Pacolli.

Ai shton se prej muajsh MABCO po përballet me pengesa të vazhdueshme, duke përmendur bllokime, vandalizëm, dëmtime të pronës dhe pengim të punimeve.

“Nëse një vendim i formës së prerë i Gjykatës mund të bllokohet nga një grup njerëzish me kamionë dhe roje private, atëherë problemi nuk është më Aeroporti i Vlorës. Problemi është vetë shteti ligjor”, përfundon reagimin e tij Pacolli.