Një aksident i rëndë rrugor është regjistruar në orët e para të mëngjesit në aksin Lezhë–Milot, ku përplasja mes një kamioni dhe një automjeti ka përfunduar me një viktimë dhe dy persona të plagosur.

Sipas informacionit paraprak të Policisë, ngjarja ka ndodhur rreth orës 04:30, kur një automjet tip kamion, i drejtuar nga shtetasi A. M., është përplasur me një automjet që drejtohej nga shtetasi kosovar K. B.

Si pasojë e përplasjes së fortë, drejtuesi i automjetit, K. B., ka humbur jetën në vendngjarje.

Ndërkohë, motra e tij, shtetasja F. B., dhe djali i tij, po me inicialet F. B., janë transportuar me urgjencë drejt Spitalit të Traumës në Tiranë, ku po marrin ndihmën e nevojshme mjekësore. Sipas autoriteteve, të dy ndodhen jashtë rrezikut për jetën.

Pas aksidentit, drejtuesi i kamionit, shtetasi A. M., është shoqëruar në Komisariatin e Policisë Lezhë, ku po kryhen veprimet procedurale për zbardhjen e plotë të ngjarjes.

Grupi hetimor ndodhet në vendin e aksidentit dhe po punon për të sqaruar shkaqet dhe rrethanat që çuan në këtë tragjedi rrugore.