Eglant Koçi është shpallur zyrtarisht i vdekur. Analiza e ADN-së së kryer nga Instituti i Mjekësisë Ligjore ka konfirmuar se trupi i gjetur në fshatin Cërrujë, në kufirin mes Tiranës dhe Elbasanit, i përket të riut që dyshohet se është vrarë nga shoku i tij i ngushtë.

Hetuesit kanë marrë një mostër nga nëna e Eglantit dhe, pas kryerjes së analizave përkatëse, kanë konfirmuar përfundimisht identitetin e viktimës.

Familja Koçi është njoftuar për rezultatet e ADN-së dhe pritet të paraqitet në ambientet e Institutit të Mjekësisë Ligjore në Tiranë për të tërhequr trupin e të riut dhe për ta përcjellë për në banesën e fundit.

Eglant Koçi u pa për herë të fundit më 4 qershor në zonën e sheshit “Wilson” në Tiranë, teksa lëvizte me motomjet. Nga pamjet e publikuara edhe nga Newsbomb.al, i riu shihej edhe në një servis automjetesh, vetëm pak orë para se të humbte çdo kontakt me familjarët.

Një ditë më vonë, më 5 qershor, familjarët denoncuan zhdukjen e tij në polici, duke vënë në lëvizje autoritetet. Gjatë ditëve në vijim, agjentët e Krimeve të Rënda arritën të gjenin motomjetin e 34-vjeçarit pranë zonës së “5 Majit”, ndërsa më pas identifikuan edhe ambientin ku ai dyshohet se ishte dërguar pas rrëmbimit.

Mirëpo sipas hetuesve, nga ambienti ku është futur Eglant Koçi, më vonë ka dalë vetëm autori i dyshuar Armand Shakaj, i njohur ndryshe si “Mand Dhelpra”.

Ai dyshohet se ka ekzekutuar 34-vjeçarin dhe trupin e tij e ka futur në një çantë të zezë, të cilën më pas e ka hedhur në një humnerë në fshatin Cërrujë. Policia ka shpallur në kërkim 41-vjeçarin Armand Shakaj, i cili dyshohet si autor i rrëmbimit dhe vrasjes së të riut.

Hetuesit po verifikojnë nëse ai ka vepruar i vetëm apo në bashkëpunim me persona të tjerë.