Një 53-vjeçar ukrainas, i shpallur në kërkim nga autoritetet e Kievit për trafik të lëndëve narkotike si pjesë e një organizate kriminale, është arrestuar në aeroportin e Rinasit.

Sipas Policisë së Shtetit, në pranga ka rënë shtetasi Anatolii Streletskyi, 53 vjeç, i cili është arrestuar në momentin që ka zbritur në aeroport.

Arrestimi është bërë pas shkëmbimit në kohë reale të informacionit mes Njësisë së Shërbimeve të Përbashkëta Investigative në Departamentin e Policisë Kriminale, Komisariatit të Policisë Kufitare Rinas dhe Njësisë së Hetimeve Ndërkombëtare Federale DSS/OCIU, pranë Ambasadës së Shteteve të Bashkuara në Tiranë.

Sipas Policisë, Streletskyi ishte shpallur në kërkim nga autoritetet ligjzbatuese të Kievit për trafik të lëndëve narkotike, në kuadër të një organizate kriminale.

“Policia e Shtetit po punon me agjencitë partnere lidhur me këtë anëtar të organizatës kriminale, si dhe Interpol Tirana po punon për fillimin e procedurave të ekstradimit me homologët ukrainas”, thuhet në njoftim.

Policia e Shtetit ka falënderuar gjithashtu agjencitë partnere për bashkëpunimin e vazhdueshëm në Shqipëri.