Deputetja e Partisë Socialiste, Sara Mila, ka reaguar pas publikimit nga kryeministri Edi Rama të një dokumenti që, sipas tij, tregon se Dritan Goxhaj kishte refuzuar të merrte pjesë në luftën e Kosovës në vitin 1999.

Përmes një video-mesazhi në rrjetet sociale, Mila ka akuzuar Goxhajn, i cili lexoi kërkesat e protestuesve në ditën e 23-të të protestës, se ka devijuar kauzën fillestare të lëvizjes dhe po e përdor atë për qëllime politike.

“Për 22 ditë refuzuan të nxirrnin një përfaqësues. Në të 23-ën zgjodhën Dritan Goxhajn: njeriun që, sipas dokumentit të publikuar nga viti 1999, kur iu kërkua të qëndronte për luftën e Kosovës, u përgjigj: ‘Nuk më ka marrë koka erë’. Sot, çuditërisht, i ka marrë koka erë të shpëtojë Shqipërinë”, shprehet deputetja socialiste.

Më tej, Mila pretendon se tashmë është zbuluar orientimi i vërtetë i protestës, duke e lidhur figurën e Goxhajt me qëndrime që ajo i cilëson problematike në planin politik dhe gjeopolitik.

“Pas 22 ditësh ‘protestë pa prijës’, maska ra: zëdhënësi i ‘Shqipërisë së Re’ është një figurë me retorikë publike pro-Iranit, pro-Hezbollahut dhe antiamerikane. Jo alternativë politike, por një karikaturë gjeopolitike”, deklaron ajo.

Deputetja iu referua edhe një prej thirrjeve të përdorura gjatë protestave, duke ironizuar rolin e Goxhajt në lëvizje.

“Në protestë kam dëgjuar të thonë se ‘ka një vend në ferr për neutralët në kohë trazirash’. Ndoshta, prijësi revolucionar është fiks rasti. Por për ata që ndezin trazirat dhe i shesin si patriotizëm, me siguri duhet të jetë rezervuar një kat më vete”, përfundon reagimin e saj Sara Mila.

Deklaratat e deputetes vijnë në një kohë kur protestat në Tiranë kanë hyrë në javën e katërt, ndërsa debati politik mes mazhorancës dhe organizatorëve të lëvizjes vijon të intensifikohet.